Skeireins leaf 6
- Skeireins 6:1
-
E
.... _nands, unswikunþozei warþ bi nauþai jainis insahts, swe silba is qiþiþ: «jains skal wahsjan, iþ ik minznan,» in þizei nu du leitilai hveilai galaubjan Iohanne hausjan<dans> þuhtedun, iþ afar ni filu ufarmaudein þo bi ina atgebun, eiþan waila ins maudeiþ qiþands:
- Skeireins 6:2
-
E
«jains was lukarn brinnando jah liuhtjando, iþ jus wildeduþ swignjan du hveilai in liuhada is. aþþan ik haba weitwodiþa maizein þamma Iohanne; þo auk waurstwa þoei atgaf mis atta, ei ik taujau þo, þo waurstwa þoei ik tauja, weitwodjand bi mik, þatei atta mik insandida.»
- Skeireins 6:3
-
E
jains auk manniskaim waurdam weitwodjands tweifljan þuhta, sunjeins wisands, þaim unkunnandam mahta; iþ attins þairh meina waurstwa weitwodei alla ufar insaht manniskodaus Iohannes unandsok izwis undredan mag kunþi.
- Skeireins 6:4
-
E
unte hvarjatoh waurde at mannam innuman maht ist anþarleikein inmaidjan, iþ þo weihona waurstwa, unandsakana wisandona, gaswikunþjand[ona] þis waurkjandins dom, bairhtaba gabandwjandona þatei fram attin insandiþs was us himina.
- Skeireins 6:5
-
E
inuh þis qiþiþ: «jah saei sandida mik atta, sah weitwodeiþ bi mik.»
- Skeireins 6:6
-
E
aþþan missaleiks jah in missaleikaim melam attins bi in[n]a warþ weitwodeins, suman þairh praufete waurda, sumanuh þan þairh stibna us himina, sumanuh þan þairh taiknins.
- Skeireins 6:7
-
E
iþ in þizei þaim swa waurþanam hardizo þizei ungalaubjandane warþ hairto, inuh þis garaihtaba anaaiauk qiþands: «nih stibna is hvanhun gahausideduþ nih siun is gasehvuþ, jah waurd is ni habaiþ wisando in izwis, þande þanei insandida jains, þammuh jus ni galaubeiþ».
- Skeireins 6:8
-
E
unte at þaim gahvairbam frakunnan ni skuld ist, iþ sumai jah stibna is gahausidedun, sumai þan is siun sehvun: «audagai» auk þan qaþ «þai hrainjahairtans, unte þai guþ gasaihvand.»
- Skeireins 6:9
-
E
jah ju þaþro swe wadi þairh ....
previous | next | xml